NAGA CITY – Nagkalasog-lasog ang ulo at katawan ng isang lalaki matapos masagasaan ng pampasaherong bus sa kahabaan ng kalsada sa Barangay Ayugan, Ocampo, Camarines Sur.
Sa panayam ng Bombo Radyo Naga kay PStaff Sgt. Denver Galos kan Ocampo-PNP, sinabi nitong base sa kanilang pagtatanong sa mga residente sa lugar, unang nakita ang naturang biktima na tila lasing at nahiga sa gitna mismo ng kalsada.
Magkailang beses pa aniya itong sinaway hanggang sa napadaan na ang isang pampasaherong bus at nasagasaan ang biktima.
Ayon kay Galos, hindi pa nila matukoy ang pagkakakilanlan ng biktima dahil halos napisa aniya ang ulo nito.
Samantala, nasa kustodiya na ng mga otoridad ang driver ng bus at nabigla rin aniya ito dahil hindi nito napansin na may nasagasaan na itong tao.
Dagdag pa ni Galos, kung titingnan aniya sa dashcam ng bus, hindi talaga mapapansin na tao ang nakahiga sa kalsada dahil tila isang bagay lamang itong nahulog sa naturang lugar.
