(UPDATE) NAGA CITY- Nakaandam suboot an barangay kapitan hale sa banwaan nin Minalabac, Camarines Sur na atubangon an anuman na kaso na isasangat laban sa saiya kan pamilya kan lalaki na na-comatose makalihis na mabagok an payo kaini.
Ini an sinaysay ni Jesus Batalla, kapitan kan barangay Salingogon sa entrevista kan Bombo Radyo Naga.
Sigon ki Batalla, nakaandam siya sa anuman na kaso o reklamo na isasangat laban sa saiya kan pamilya ni Leon Farab na nagtitinir ngonyan na kritikal an kamugtakan sa Bicol Medical Center (BMC).
Sigon ki Batalla, dae niya papabayaan an mga pangangaipuhan kan pamilya ni Farab urog na an mga babayadan sa ospital katakod kan pagpaparahay kaini.
Pigklaro man kan nasambitang barangay kapitan na mayo siyang intensyon na kulgan si Farab huli ta mawot sana niya na madisiplina ini makalihis na magparibok sa saindang lugar.
Tinawan doon man ni Batalla na mayo siyang planong magdulag makalihis an pangyayari.
