NAGA CITY-Pigtanggal sa serbisyo an lampas 500 nin kapulisan sa Metro Manila mantang 800 man an pigpadusahan puon kan Hulyo kan nakaaging taon sa tahaw kan mas pinakusog pang internal cleansing laban sa mga pasaway na pulis.
Sigun ki National Capital Region Police Office (NCRPO) director Maj. Gen. Jose Melencio Nartatez Jr., an mga pigpadusahang kapulisan pigpatawan nin administrative charges mantang tinanggal man gikan sa police service an mga nahahampang sa serious offenses.
Sa ngunyan pinagsugo na kan NCRPO director na rikasan an pag-review sa lampas 4,000 nin dokumento na may kinaaraman sa administrative charges kan iba pang kapulisan.
Target man na maresolbaran gabos nin nasambitang mga kaso sa laog nin duwa hasta sa tolong bulan.
Pigsagibo kan NCRPO an patara-tara sa tahaw kan pagkakaimbwelto kan pirang pulis sa manlaen-laen nin mga ilegal na aktibidad kun saen an pinakahuri an sarong lieutenant colonel na pig-arestar huli sa carnapping katakod kan sarong pigrentahang sasakyan na pigpabakal sa Parañaque City.
