Aram baya nindo mga ka-bombo, labi 1, 400 na katawo sa Anaheim, California an nagpartisipar sa makasaysayang pagkakawat kan “Red Light, Green Light” tanganing masungkit an Guinness World Record para sa Largest Game of Red Light, Green Light.
Nangyari an pakawat sa Yorbe Park kun saen kaibahan sa mga nagpartisipar an mga estudyante gikan sa Anaheim Elementary School District, saindang mga pamilya, asin nagapirang mga nagpasiring sa lugar gikan sa ibang distrito.
Nakibali man an mga lokal na bombero, pulis, asin nagkapirang opisyal tanganing makumpleto an record na 1, 423 partisipantes.
An “Red Light, Green Light”, o mas bistado sa Pilipinas komo “Pepsi-7Up”, an sarong kawat na pang-aki kun saen kaipuhan na magdalagan an mga parakawat enkaso sinabing “Green Light”, asin biglang mapundo kun “Red Light” man.
An sisay man na maghiro sa kasugoan na “Red Light” an mahahali sa kawat. Nagin mas bistado pa an kawat na ini sa bilog na kinaban makalihis ining itampok komo enot na deadly game sa sikat na Netflix series na Squid Game.
Sigun ki Guinness Records adjudicator Brittany Dunn, nagin makabuluhan an pagtiripon bako sana para sa mga kaakian kundi pati na man sa mga gurang, sarong pagiromdom na an pagkakawat an mayong pigpipiling edad.
