Naniniwala ang isang law professor, author, at private practitioner, na may legal at praktikal na batayan ang panukalang ibaba sa 10 taong gulang ang minimum age of criminal responsibility sa bansa.
Sa panayam ng Bombo Radyo Naga kay Atty. Benjamin Guillermo B. Magadia Law Professor, Author, Private Practitioner na ang panukala ay hindi nangangahulugang agad na ikukulong o papatawan ng parehong parusa ang mga batang masasangkot sa krimen tulad ng mga nasa hustong gulang. Sa halip, layunin nitong tugunan ang mga sitwasyon kung saan nagagamit umano ng mga sindikato at organisadong grupo ang mga menor de edad upang makaiwas sa pananagutan sa batas.
Ayon kay Magadia, mahalagang kilalanin na may mga pagkakataong ang mga batang nasa edad 10 pataas ay may sapat nang pag-unawa sa tama at mali, lalo na sa mga seryosong paglabag sa batas. Aniya, dapat magkaroon ng mekanismo ang legal system upang matukoy ang antas ng pag-unawa at pananagutan ng isang bata sa bawat kaso.
Binigyang-diin din ng law professor na nananatiling mahalaga ang rehabilitasyon, counseling, at intervention programs para sa mga batang masasangkot sa krimen. Aniya, dapat na sabayan ng anumang pagbabago sa batas ang pagpapalakas ng mga social welfare programs at child protection mechanisms.
Dagdag pa niya, ang pananagutan sa ilalim ng batas ay hindi dapat tingnan bilang simpleng kaparusahan kundi bilang bahagi ng proseso ng pagtutuwid at paggabay sa kabataan upang maiwasan ang mas malalaking paglabag sa hinaharap.
Gayunpaman, kinilala ni Magadia na nananatiling usapin ng debate ang panukala, lalo na sa mga grupong nagsusulong ng karapatan ng mga bata. Aniya, mahalagang magkaroon ng masusing pag-aaral at malawakang konsultasyon upang matiyak na ang anumang reporma ay makabubuti sa kapakanan ng mga menor de edad at sa interes ng publiko.
Sa kasalukuyan, patuloy ang talakayan sa iba’t ibang sektor hinggil sa panukalang baguhin ang minimum age of criminal responsibility, isang isyung may malalim na implikasyon sa sistema ng hustisya, karapatan ng mga bata, at kaligtasan ng komunidad.
