Naghampang sa primerong pagkakataon makalihis an nagkapirng dekada an mga sibilyang representes kan Lebanon asin Israel sa urulay na pigkundusir kan nakalihis na Miyerkules sa himpilan kan UN peacekeeping force sa Naqura, komo parte kan mekanismo na nagbabantay sa ceasefire kan Nobyembre 2024 sa pag-ultanan kan Israel asin Hezbollah.
Hurot ni Lebanese Prime Minister Nawaf Salam, limitado an pag-uulay sa pagpapautob kan untok-putukan. Obheto soboot kan urulay iyo an “pag untok kan hostilities,” pagpapalaya sa mga Lebanese hostages, asin “kumpletong pag-withdraw kan Israel” gikan sa Lebanon.
Padagos man an air strikes kan Israel sa Lebanon asin nagtitinir pa an saindang tropa sa lima pang lugar sa timog, taliwas sa kondisyon kan ceasefire.
Iniladawan ni Israeli Prime Minister Benjamin Netanyahu an pulong komo “positive” asin sinabing nagkasundo an duwang panig na pag-adalan an posibleng economic cooperation, alagad pighurot na “essential” an pag-disarma sa Hezbollah. Kaiba sa mekanismo an Estados Unidos, France, asin United Nations.
Sigun sa US Embassy sa Beirut, an partisipasyon kan mga sibilyan an parte kan paghihilingan na ibusol an political asin military discussions para sa “security, stability, asin durable peace.”
Nag atendir man si US special envoy Morgan Ortagus. Sinaysay ni Salam na bukas an Lebanon sa pag-verify sa lakdang kan saindang hukbong sandatahan tangani i-disarma an Hezbollah. Dugang pa kaini, “Normalisation will follow peace. It cannot precede peace.”
Padagos an pag-atake kan Israel laban sa Hezbollah tangani na pugulan soboot an liwat na pagbilog kan pwersa kaini. Nakatalaang baklason kan Lebanese army an imprastraktura kan Hezbollah sa timog kan Litani River antes matapos an taon
Alagad nag-escalate pa man an atake kan Israel huli ta kulang soboot an lakdang kan Lebanon. Nagpepreparar an Israel para sa sarong “significant escalation” laban sa Hezbollah.
