NAGA CITY- Padagos an pigkukundusir na assessment kan lokal na gobierno kan Calabanga sa saindang banwaan para sa mga naapektaran kan shear line.
Sa entrevista kan Bombo Radyo Naga ki Adonis Aguilar Jr. Municipal Councilor kan LGU Calabanga, sinaysay kaini na dae nag-uuntok an LGU-Calabanga sa pagmonitor sa kamugtakan kan panahon siringman sa mga posibleng naapektaran kan naeksperyensiyahan na labing pag-uran.
Katakod kaini, numero uno soboot sa naapektaran kan nasambitan ng raot nin panahon iyo man an mga parasisira nin huli ta dae an mga ini nakakapaglawod huli sa kamugtakan kan dagat.
Sigun sa opisyal kun dae makapaglawod apektado man an kabuhayan kan mga fisherfolk nin huli ta mayong dakop na sira.
Apwera digde, yaon man an pag-assess sa lado kan mga paraoma orog na sa mga naenot ng nakatanom kun igwang nadanyaran sa saindang mga pananom. Preparado soboot magtaong tabang an Municipal Agriculture Office kan saindang banwaan para sa mga naapektaran.
Sa ngunyan, piglalaoman na makakabweltada na sa normal an pagbuhay kan saindang mga residentes nin huli ta marhay naman soboot an panahon ngunyan na aldaw.
