NAGA CITY – Nakatalaan nang matapos an pilot testing kan LTO-LGU interconnectivity project asin pig-aayos na an mga adjustments asin recommendation na kaipuhan gibuhon.
Sa nagin paghampang sa mga kagawad kan media ni Renne Gumba, pamayo kan Public Safety Office Naga, sinaysay kaini na makalihis na mapakarhay an gabos magpapadagos na an implementasyon kaini asin maexpand pa gikan sa dating inisyal na 20 units idedeploy na an haros gabos na 65 enforcers.
An nasambitan ng interconnectivity project an alinsunod sa RA 10930 na nag-aamyendar sa pagkua nin lisensya; sa pag extend kan validity kan lisensya asin pag record kan mga violation kan mga violators sa mismong system kan LTO. Sa irarom kan ley na ini, an gabos na madadakop sa LGU an irereport sa LTO, kun sain an pagreport kaini an online rason kun tanu nagkaigwa sinda nin online system.
An purpose kaini an gabos na mga violators an magkaigwa nin record sa LTO, tanganing maaraman kun sisay na mga drivers an igwa nin mga traffic violations. Ini nin huli ta an sisay man na magkakaigwa nin bayolasyon an magkakaigwa nin demerit points o pagbawas sa validity kan saindang mga lisensya.
Enkaso man na magkaigwa nin demerit points dae na makakarenew nin lisensya na igwa nin validity na 10 years. Sa ibong na lado, pigsaysay man kan opisyal na mayo man nin nagin problema sa gadgets na saindang piggagamit sa nasambitan ng operasyon.
Komo kasimbagan man sa problema kun sain igwa nin mga motorista na nagrereklamo huli sa halangkaw na bayad enkaso nagbabayad sinda online, paramientras ining isususpendir asin sa mismong treasurer’s office na muna sinda magbabayad.
