Pig-anunsyar kan Vatican na isasagibo an lubong ni Pope Francis sa Sabado, Abril 26, alas-10 nin pagkaaga sa St. Peter’s Basilica.
Marurumdoman, nagtalikod na sa kinaban si Pope Francis kan Lunes sa edad na 88, makalihis ma-stroke asin atakon sa puso.
Mientrastanto, nagtiripon an mga kardinal kan Martes, Abril 22, tanganing magpreparar para sa pag-halal kan bagong Papa sa laog nin tolong semana.
Nagdeklara man an Argentina, kun saen naggikan an Santo Papa nin sarong semanang ‘national mourning’, siringman an India na nagtalaan nin tolong aldaw nin ‘national mourning.’
Piglalaoman an mga namamayo kan manlaen-laen na nasyon asin mga miyembro kan royal family sa libong ni Pope Francis sa St. Peter’s Basilica.
Enot nang inaunsyar ni US President Donald Trump na maatendir ini. Sigun sa mga panundon kan Simbahang Katolika, an libong ni Pope Francis an mangyayari sa pag-ultanan kan Biyernes asin Dominggo, tolo hasta anom na aldaw gikan sa saiyang pagkagadan.
An lawas kan Santo Papa an ililipat gikan sa Santa Marta chapel pasirinng St. Peter’s Basilica sa Miyerkules, Abril 23, tanganing maipagkaloob sa mga deboto an pagkakataon na magtao nin respeto. Nakapalaog sa saiyang huring habilin na ini an ilulubong sa Santa Maria Maggiore basilica sa Roma, sarong historya huli ta igwa nin sarong Santo Papa na inilibong sa luwas kan Vatican.
Si Pope Francis, o sa tunay na buhay Jorge Bergoglio, an enot na Papa gikan sa Latin American asin enot na Jesuit na naging lider kan Simbahang Katolika.
Sa laog nin 12 taon kan saiyang papacy, naging tagapagtaguyod ini para sa mga nagtitios, mga migrants, asin sa kalikasan.
Siringman, nabisto an saiyang mga lakdang tanganing repormahon an pamamayo kan Vatican asin an pagtutok sa mga isyu kan katarungang panlipunan asin mga biktima kan sekswal na pang-aabuso sa laog kan simbahan.
