Hahabulon kan Bureau of Customs (BOC) an nagkapirang luxury cars kan mga Discaya na dae binayadan nin nagkakanigong import duties and taxes.
Nakatalaang iluwas kan BOC an partial report sa Martes, Setyembre 9, katakod sa 28 luxury vehicles kan mga Discaya na nasa saindang kostudiya makalihis matukoy sa inisyal na imbestigasyon na dae bayad nin tamang buwis.
Sinaysay ni BOC Commissioner Ariel Nepomuceno na kun mapatunayan na an pamilya Discaya an nagbakal nin mga lunadan asin sa pagbakal o an dokumento an falsified, maninimbag sinda sa ley.
Enkaso man na matukoy na nagbakal an Discaya sa dealers, an BOC man an masunad nin kaso sa dealers, asin an Discaya an pwedeng magsuad nin kaso laban sa dealers huli ta an BOC kukumpiskaron an mga imbwelto na lunadan, ‘in favor of the government’, ani Nepomuceno.
Inaaram man kan BOC an posibleng involvement kan Customs personnel tanngani mailaog sa nasyon an luxury cars kan mga Discaya.
Nasa 28 na an kapot kan BOC, 16 an isinurender kan mga Discaya kan nakalihis na Setyembre 4, mantang an naenot man na 12 an kinua sa sainda sa operasyon kan BOC sa paagi man kan search warrants para sa beripikasyon kun nasisimbagan an Customs Modernization and Tariff Act.
An mag-agom na Curlee asin Sarah Discaya an kabali sa iniimbestigaran kan Senado sa soboot maanomalyang flood control projects.
