Piglalaoman na magigin makasaysayan ngunyan na aldaw sa Senado huli ta dedesisyunan kan mga senador an impeachment case kontra ki Vice President Sara Duterte.
Pig-aantabayan na sa Mataas na Kapulungan kan Kongreso an nakaratalaan na pag-urulay asin botohan sa impeachment case na isasagibo sa sesyon ngunyan na alas 3:00 nin hapon.
Marurumduman, pigsaysay ni Senate Majority Leader Joel Villanueva na sulamenteng agenda ngunyan na aldaw an pag-urulay asin posibleng botohan sa nagin Supreme Court ruling na nagdedeklarar na unconstitutional an impeachment case kontra ki VP Sara.
Sa ibong man kan piglaaloman na botohan, pirang senador pa man giraray an nag-apelar na halaton kan Senado an desisyon kan Korte Suprema sa motion for reconsideration kan Kamara dapit sa impeachment case.
Pigpatanid man ni Senator Panfilo Lacson, makakamarhay na magin malikay asin dae magpadalos-dalos an mga senador sa gigibuhong debate asin botohan huli ta igwa pang nakabinbin na motion for reconsideration
Pigsaysay kan senador na binasa kaini an motion for reconsideration na pigsunad kan Kamara sa paagi ni Solicitor General Darlene Marie Berberabe asin sa hiling kaini asin kan saiyang legal staff siringman kan mga legal observer na pusog an argumentong piglatag.
