NAGA CITY- Mahigit sa P500K na halaga ng shabu ang nasamsam ng mga otoridad sa isang lalaki sa isinagawang buy-bust operation sa Brgy Pahinga Norte, Candelaria Quezon.
Kinilala ang suspek na si Jhaziel Nonan Garcia alias “Jazel”, 36 anyos, residente ng Brgy Poblacion sa naturang bayan.
Sa nakalap na impormasyon ng Bombo Radyo Naga sa Quezon Police Provincial Office, naaresto ang nasabing suspek matapos makabili ng isang transparent plastic sachet ng nasabing droga ang isang pulis na nagpanggap bilang poseur buyer.
Nabatid din na narekober kay Garcia ang isang itim na pouch na may lamang limang pirasong heat-sealed transparent sachet ng pinaniniwalaang shabu.
Sa inisyal na imbestigasyon ng mga otoridad, tinatayang may bigat na 25.02 grams ang mga narekober na droga at tinatayang aabot sa kabuuang halaga na P510,408.
Sa ngayon, nasa kustodiya na ng mga otoridad ang suspek para sa karampatang disposisyon.
