Pigkumpirmar kan Malacañang Palace na magkakaigwa nin virtual trilateral Phone Call meeting sa pag-ultanan ni Presidente Ferdinand Marcos Jr., outgoing US President Joe Biden asin Japanese Prime Minister Ishiba Shigeru.
Segun ki Presidential Communications Office Secretary Cesar Chavez, nakatalaan an nasabing phone call meeting ngunyan na maabot na Domingo, Enero 12, 2025 asin nakapalaman sa schedule kan Presidente.
Dai masabi ni Secretary Chavez kun ano an pwedeng pag-olayan kan tolong lideres. Basado sa report gikan sa White House sa Amerika, an pagtiripon papangenotan kan nagluluwas na Presidente kan Estados Unidos na si Biden.
Sa ngunyan, pigkokondusir ni Biden an saiyang huring opisyal na pagbisita sa Italy asin gigibohon an nasambitan na virtual phone call digdi.
Segun sa US, katuyuhan kan nasabing pagtiripon kan tolong lideres na mapakusog an trilateral partnership kan tolong nasyon asin mga lakdang ngani na maseguro an rehiyon kan Indo-Pacific.
Kun marurumdoman, nagkaigwa nin sarong trilateral na summit kan nakalihis na taon sa Washington DC kun saen an tolong lider pinag-olayan an manlaen-laen na isyu kabali an kooperasyon sa seguridad, pagpapauswag kan imprastraktura, asin rehiyonal na katatagan sa ekonomiya.
Kan nakalihis man na Disyembre 2024, an tolong nasyon nagkaigwa nin sarong multilateral maritime cooperative activity na may katuyuhan na ipahiling an saindang promisa sa pagprotehir kan international waters asin pagseguro nin katalingkasan sa nabigasyon sa rehiyon kan Indo-Pacific kasunod kan mga tensyon sa West Philippine Sea.
