NAGA CITY- Pigtawan duon kan sarong kapitan sa siyudad nin Naga an importansya asin katabangan kan pagbubugtak nin Jetmatic ngunyan na naeeksperyensiyahan an labing init kan panahon.
Sa entrevista kan Bombo Radyo Naga ki Cyrus Caballero, Kapitan kan Barangay Sabang, Naga City, pigsaysay kaini na bandang alas 12 nin mag-oomagahon nagbubulos an tubig sa pirang parte kan saindang barangay, alagad may mga parte orog na an harani sa centro an dae man nawawaran nin bulos kan tubig alagad maluya.
Katakod kaini, aram naman soboot kan mga residentes na pigpapakarhay na kan Metropolitant Naga Water District an nasambitan ng problema kun kaya nagti-tyaga paramientras an mga ini.
Sigun pa ki Caballero, igwa man sindang deepwell na nagdudugang sa saindang supply sa tubig.
Mientrastanto, papakarhayon naman asin riribayan an mga Jetmatic sa saindang barangay na dakulang katabangan sa mga residentes.
Sa ibong na lado, nagtitinir na mayong nagrereklamo sa sainda dapit sa food poisoning nin huli ta an iba soboot an dae man masyado nagbabarakal.
Sa ngunyan, pagirumdom na sana kan kapitan na likayan magpaparuluwas tanganing makalikay sa epektong dara kan labing init nin panahon.
