NAGA CITY- Piglatag na kan LGU-Naga an manlaen-laen na aktibidad katakod kan Peñafrancia Fiesta ngunyan na taong 2024.
Sa nagin paghampang sa mga kagawad kan media ni Allen Reondanga, an pamayo kan CEPPIO-Naga, sinaysay kaini na puon August 31, 2024 hasta sa bulan kan Setyembre igwa ng mga aktibidad an ikukundusir sa bilog na siyudad nin Naga orog na ta ngunyan na taon an ika-100 na Canonical Coronation ni Our Lady of Peñafrancia.
Katakod kaini, para sa August 31, 2024 magkakaigwa nin Ms. Bicolandia Public Presentation kun saen piglalaoman an nasa 1,000 hasta sa nasa 1500 na mga madalan.
Makalihis ini sa Setyembre 3, 2024 isasagibo man an transfer kan Imahe ni El Divino Rostro pasiring sa Old Shrine ni Our Lady of Peñafrancia.
Apwera digde sa mga masurunod man na aldaw ikukundusir an parade, marathon, music and arts feast, exhibition siringman an pinaka-highlight kan okasyon an traslacion procession.
Sigun ki Reondanga, mas magigin mahigot pa an saindang pagbabantay asin pag monitor katabang an mga otoridad tanganing masierto an kasalbaduhan kan mga deboto na mabisita sa siyudad na pinaglalaoman na mapakol sa milyon ngunyan na taon.
Katakod digde, liwat man na nagpagirumdom an opisyal sa publiko na magsunod sa gabos na mga panundunan na saindang piglatag katakod kan aktibidad tanganing dae mabugtak sa alanganin na sitwasyon.
