Katuwang kan Municipal Disaster Risk Reduction and Management Office (MDRRMO)-Lupi, an manlaen-laen na mga uniformed personnel tanganing magmanihar kan trapiko sa Lupi, Camarines Sur.
Sigun ki Garry Cruz, Lupi MDRRMO Head, na sa presente yaon an Philippine National Police (PNP), mga augmentation personnel gikan sa LTO, duwang augmentation team gikan sa PPO, asin Kabalikat-Bikol katuwang an MDRRMO sa pagmanehar kan trapiko sa nasambitan ng lugar.
Sigun pa ki Cruz, sa ibong kan kadakol na mga enforcers, dae paman giraray nalilikayan an trapiko orog na ta an iba behikulo nararaotan man sa tahaw kan tinampo.
Katakod kaini, nagpagirumdom man an opisyal sa mga byahero na magin mapag-intindi asin pasensya orog na ta dakol na behikulo an piglalaoman pa na maagi sa saindang banwaan gikan sa Metro Manila pasiring Bicol Region. Siringman, siertohon na nasa marhay na kamugtakan an saindang sadiri asin mga behikulo antes magbyahe.
