NAGA CITY – Tinawan duon kan sarong abogado an nagkapirang isyu na nakapatos sa Pantawid Pamilyang Pilipino Program o 4Ps.
Sa entrevista kan Bombo Radyo Naga ki Atty. Princess Dianne Kris Decierdo, sarong attorney sa sarong law firm, sinaysay kaini na nagkapira sa mga rason kun tanu nahahali sa listahan kan mga benipisyaryo an sarong miembro kan 4Ps an huli ta nagkakaigwa sinda nin bayolasyon siring na sana kan pagpapabakal kan saindang ATM card.
An iba man an pighahali huli ta posibleng nakaangat naman an kalidad kan saindang buhay asin kaya na ninda na magtindog na dae nangangaipuhan nin tabang gikan sa gobierno.
Enkaso man an sarong pamilya an kadakol nin aki pigtatagaman sana sinda nin certain amount na pupwede nindang maresibe sa laog kan sarong bulan.
Pag-abot man sa isyu na igwa nin mga lugar na igwa nin nagigin benipisyaryo kan programa na marhay na an kamugtakan kan buhay an huli sa kadaklan kan mga benipisyaryo dae na nasarara an mga ini, mantang an iba man an huli sa dae pagigin mahigot kan pagpapautob kan mga kwalipikasyon orog na pag-abot sa kita kan sarong pamilya.
Sa ngunyan pangapudan na sana kan abogado sa gobierno na magin mabusisi sa pagsara sa mga magigin benipisyaryo kan programa tanganing masierto na sulamenteng an mga labing nangangaipuhan sana kaini an makakabali.
Pag-abot man sa lado kan mga residentes dapat man na magin honesto sa pag heras kan saindang mga impormasyon pag-abot sa saindang mga income.
