Nairehistro an mararahas na labanan sa pag-ultanan kan kampo kan nagpo-protesta asin security forces sa tahaw kan paghewas pa kan hiro-protesta sa Iran.
Ini na an ika-11 aldaw kan mga serye kan hiro-protesta sa nasambitan na bansa.
Basado sa report kan sarong news agency sa Iran na harani sa Revolutionary Guards, nagadan an duwang pulis makalihis badilon kan mga armadong indibidwal sa may south-western town kan Lordegan.
Sa mga pigheras na video online, mahihiling an tensiyonadong labanan sa pag-ultanan kan mga protester asin security forces kun saen madadangog an mga tanog kan putok ka badil.
Sa sarong footage man gikan sa iba pang mga lugar sa Iran, may pigpakuriyat na security forces na nagpaputok nin badil asin nag-aapon kan tear gas kontra sa mga nagpoprotesta, kun saen pira sa saindang piggapo an mga pwersa kan gobyerno.
Naghewas pa an mga demonstrasyon sa 111 cities asin towns sa gabos kan 31 probinsiya kan Iran, basado sa report gikan sa sarong news agency na nakabase sa US.
Sa kabilogan, napaulat na nasa 34 na protester asin apat na security personnel an nagadan sa kasagsagan kan kariribukan asin may 2,200 protesters an naaresto.
Marurumduman, sumiklab an mga protesta sa Iran kan Disyembre 28, kan magprotesta an shopkeepers sa mga tinampo kan kabisera kan Tehran para ihayag an saindang kaanggutan sa pagbagsak kan kantidad kan Iranian currency na rial kontra sa dolyar kan Amerika.
Kalaunan, nag-iba an University students sa mga protesta asin nagpuon magkalat sa iba pang mga siyudad kan Iran.
