Idineklarar kan Philippine National Police (PNP) asin Philippine Coast Guard (PCG) na nagin matoninong asin marhay an pag-obserbar kan Undas 2025, basado report kan mga command center kasuodma, Nobyembre 1.
Sigun ki PNP acting chief Lt. Gen. Jose Melencio Nartatez Jr., mayong naikurit na insidente sa mga sementeryo, terminal, asin matatawong lugar sa bilog na nasyon.
Labi 50,000 pulis an naipakuriyat puon Oktubre 30, katuwang an AFP, PCG, asin mga lokal na gobyerno.
Mientrastanto, pigreport ni PCG spokesperson Capt. Noemie Cayabyab na nag-abot sa labi 700,000 pasahero an nagbiyahe sa mga pantalan puon Oktubre 30 hasta Nobyembre 1- mas hababa kumparar sa labi 2 milyong pasahero kan nakalihis na Undas 2024.
Sigun sa PCG, kadaklan sa mga biyahero an gikan sa Cebu, Batangas, asin Iloilo.
Dugang pa ni Cayabyab, pinahigot an pre-departure inspections asin labi na pigpapautob an mga patakaran kontra sa overloading.
Padagos man an deployment kan rescue swimmers, medical teams, asin floating assets sa mga pantalan asin baybayon tanganing masierto an kasalbaduhan kan mga biyahero sa panahon kan Undas.
