NAGA CITY- Nagpaluwas nin abiso an MDRRMO Sagñay na salbado na an Sagñay asin Tiwi Road.
Ini an makalihis na mairehistro an rockslide insident asin pag-apaw kan tubig sa mga low lying areas sa lugar huli sa pag-uuran na dara kan Shear line.
Sa entrevista kan Bombo Radyo Naga ki Noli Pielago, Operation Head kan MDRRMO Sagñay, sinaysay kaini na kan nakalihis na Huwebes, nai-clear naman an nagrasay na gapo na igwang gabat na nagpapakol sa 5 kilos asin nagin manageable naman an area.
Sigun sa opisyal, padagos an saindang pagmonitor katabang an PDRRMC asin magin an opisina kan saindang Alkalde tanganing tolos na matawan nin abiso an mga nag-aaragi sa lugar kun passable o dae passable an nasambitan ng tinampo.
Dugang pa kan opisyal, igwa man caution tape na nabugtak sa lugar kun saen nairehistro an pagrasay kan gapo asin igwa man soboot mga ekipahe na harani tanganing enkaso igwa na naman mairehistro na panibagong rockslide an tolos na mahahali ini asin dae na magdara nin peligro sa mga tawo.
Sa ngunyan, pigsierto na sana ni Pielago na nakabantay an saindang mga personahe sa kamugtakan kan panahon asin sitwasyon kan mga tinampo sa saindang banwaan tanganing magin salbado an gabos.
