NAGA CITY – Dakulang katabangan para sa mga paraoma sa banwaan kan Pili, Camarines Sur an itinaong mga manlaen-laen na agricultural inputs na gikan sa DA asin sa LGU-Pili.
Sa entrevista kan Bombo Radyo Naga ki Pili Mayor Tom Bongalonta Jr, sinaysay kaini na nagpakol sa 12 kooperatiba na igwang kadakol na members an nabenepisyaran kan nasambitan ng mga agricultural inputs na kinababalihan kan manlaen-laen na mga gamit kan paraoma asin mga vegetable seeds.
An mga agri-inputs na ini an gikan sa DA asin sa munisipyo kan Pili sa paagi kan Municipal Agriculture Office.
Sigun ki Bongalonta, an siring na mga paagi an nagpapahiling kan saindang kamawotan na gibuhong sentro kan agrikultura sa bilog na Bicol Region an Pili.
Katakod kaini, dakula an suporta kan LGU sa sektor kan agrikultura kun kaya igwa man ining dakulang pondo na nakatagama tanganing masimbagan an gabos na pangangaipuhan kan mga paraoma sa saindang lugar.
Importante soboot ini tangani man na dagos-dagos na natatawan nin asistensiya an lambang mga local farmers tanganing maglangkaw man an antas kan saindang pagbuhay.
Sa ngunyan, hagad na sana ni Bongalonta sa mga paraoma sa saindang banwaan na ipaabot sa saindang opisina enkaso igwang mga kinakahampang na problema tanganing tolos man na masolusyunan.
