NAGA CITY- Pigpapakarhay pa kan lokal na gobierno kan siyudad nin Naga an mga lugar na pwedeng pagbalyuhan kan mga lokal na ahensiya.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na saindang pig-aayos pa an pagkakalatag asin mga lugar na pwedeng mabalyuhan kan mga nasambitan ng ahensiya siring kan DOST tanganing dae magkaproblema sa maabot na panahon.
Sigun sa alkalde, saro soboot ini sa saindang prayoridad sa ngunyan kabali na an pagbugtak o pagkonstruher nin mga building o pasilidad na duwang palapag.
Katakod digde, huli ta madalas na binabaha man an siyudad nin Naga tuyong nagkakaigwa nin kalamidad kun kaya pigrerekomendar orog sa mga eskwelahan an pagtugdok nin two-story building.
Apwera digde, makakatabang man an siring na pasilidad sa mga kulang an espasyo.
Mientrastanto, tutuldukan naman sa masunod na taon kan alkalde an urulay pag-abot sa medical allowance orog na ta kasuarin sana pigtinataan kaini an Executive Order No. 026 na nagmamandato sa pagkriar kan technical working group.
An nasambitan ng technical working group an mamanehar sa pagtatao nin medical allowance para sa mga emplyado kan City Hall.
Sa ngunyan, pigsierto na sana kan opisyal na sa masunod na taon mailalaog na ini sa budget tanganing dagusan nang mareseber kan mga kwalipikado.
