NAGA CITY-Kaipuhang ipreparar an mga dokumentos na kaipuhan sa mga mawot na magpakasal sa ibang nasyon mantang kaipuhan na aramon man an mga ley sa ibang nasyon kun bakong Pilipino an papakasalan.
Sa entrevista kan Bombo Radyo Naga ki Attorney Joshua Remir M. Abueg, sarong litigation lawyer, kun pareho soboot Pilipino asin mapakasal sa satuyang embahada, kaipuhan soboot nin marriage license, certificate of no marriage, asin Birth Certificate.
Enkaso an saro man soboot sa ikakasal bakong Pilipino, kaipuhan na aramon an ley sa banyagang nasyon pag-abot sa formalities sa kasal kun pano ini pigkokondusir sa saindang nasyon.
Sigun pa igdi pwedeng mag-issue nin marriage license an satuyang mga konsulado nin huli ta nagsisirbi soboot ini komo local civil registrar sa kun saen man ining nasyon yaon.
Dugang pa kaini kaipuhan sana nin magsiring sa embahada tangani na makua an mga kakaipuhanong dokumento, orog na kun parehong Pilipino an ikakasal.
Sigun ki Abueg, kun mawot kan duwang Pilipino na mag-diborsyo, kaipuhan muna na magin foreign citizen an saro sainda asin ini an dapat na mag-initiate nin diborsyo tangani na legal na i-rekognisar ini sa satuyang nasyon.
Makalihis ini kaipuhan sana soboot kan Pilipinong partner na mag-petition para sa pag-rekognisar kan saindang nagin diborsyo sa sarong Regional Trial Court.
Sigun ki Abueg ini tangani na makapakasal pa an nasambitang Pilipino makalihis na marekognisar na legal an saindang diborsyo sa satuyang nasyon.
