NAGA CITY-Nagkasundo an mga nasyon na nag-atendir sa duwang aldaw na summit sa Switzerland na mag-gibo nin kasunduan tangani na dagos na nin mapundo an nangyayaring giyera sa Ukraine.
Kabali igdi an Saudi Arabia, South Africa, asin United Arab Emirates na igwang importanteng trading relationship sa Russia komo mga miyembro kan BRICS economic group.
Pigsambit ni Ukraine President Volodymyr Zelensky na importante sa mga nag-atendir an pagsuporta ninda sa territorial integrity kan Ukraine.
Pig-anunsiyar man ni US Vice President Kamala Harris na igwa sindang $1.5 bilyon na aid package na itatao sa Ukraine tangani na tabangan ini na maayos an mga naraot nindang imprastruktura.
Marurumdumang piglatag ni Russian President Vladimir Putin an saiyang mga kondisyon tangani na mapundo na an giyera sa Ukraine na pigkontra man kan United Nations asin European Union.
