Mas palalawigon pa kan Department of Agriculture (DA) an mapapabakalan kan bente pesos na bagas.
Inanunsyar ni Agriculture Secretary Francisco Tiu Laurel Jr na ibabali na man sa programa an nasa 2.8 milyong parasisira.
Kinakaipuhan sana na rehistrado an mga ini sa Registry System for Basic Sectors in Agriculture.
Kan nakalihis na aldaw, sabay-sabay na nagbukas an nasa 18 bodega kan National Food Authority (NFA) sa Central asin Northern Luzon tangani puonan an pagpapabakal kan bagas sa kantidad nin P20 kada kilo para sa mga kwalipikadong paraoma.
Makakabakal na an.mga rehistradong paraomang may duwang ektarya o mas sadit na omahan.
Siringpaman, an mga farm workers na nakalista sa Registry System for Basic Sectors in Agriculture (RSBSA).
Pwedeng pabakalan an mga ini nin hasta sa 10 kilong bagas kada bulan o sarong sako (50 kilo) para sa bulan nin Agosto hasta sa Disyembre 2025.
Sigun ki Tiu Laurel Jr., pigkakarkulong limang milyong benepisyaryo an sakop kan programa sa bilog na nasyon.
Primerong masuportaran andistribusyon, matugdok man an KADIWA ng Pangulo asin Food Terminal Inc. booths sa mga bodega kan NFA.
