Nangapudan si House Minority Leader Marcelino “Nonoy” Libanan sa Kongreso na gibuhon prayoridad an pagpasar kan panibagong AFP modernization law antes magtapos an presenteng programa sa 2027 tanganing masierto an dagos-dagos asin panghaluyan na pagpapapusog kan sandatahang lakas.
Sigun ki Libanan, an 15-taong Revised AFP Modernization Program na pigpautob kan 2012 nakatalaang magwakas sa 2027, kaya importante an tolos na aksyon kan lehislatura tanganing magin maayos an paglipat sa masunod na yugto kan modernisasyon.
Dugang pa kaini, makakatabang an tolos na pagpasar kan karibay na ley tanganing magtinir na preparado, kapani-paniwala, asin epektibo an AFP.
Saklaw kan AFP modernization program an pagbakal kan makabagong kagamitang pandepensa, kaibahan an intelligence asin surveillance capabilities, weapons systems, asin iba pang importanteng kagamitan.
Kan 2025, pighatod an duwang bagong 3,200-ton guided-missile frigates na BRP Miguel Malvar asin BRP Diego Silang, na akma sa naenot frigates na BRP Jose Rizal asin BRP Antonio Luna na nag-abot kan 2020 asin 2021.
Kaibahan man sa mga nakamit kan programa an pag-abot kan limang dugang na S-70i Black Hawk helicopters asin an pagkontrata para sa 12 FA-50PH supersonic fighter jets. Sa irarom kan 2026 General Appropriations Act, ₱40 bilyon an pigtagama para sa modernization projects kan militar, mas halangkaw kumparar sa ₱35 bilyon kan 2025.
Basado sa mga rekord kan badyet, nagpakol na sa ₱313.6 bilyon an pigtagama kan Kongreso para sa AFP modernization puon hasta, apwera pa sa ₱134.1 bilyon na unprogrammed appropriations.
