NAGA CITY – Sa kulungan ang bagsak ng isang misis dahil sa umano’y pamamaslang nito sa kanyang mister sa Barangay Bulala, Santa Elena, Camarines Norte.
Kinilala ang suspek na si Franz Gretchen Andes, 29-anyos.
Sa nakalap na impormasyon ng Bombo Radyo Naga sa Camarines Norte Police Provincial Office, nabatid na umuwing lango sa alak ang biktimang si Emmanuel Andes.
Nagkaroon umano ng pagtatalo ang mag-asawa na nauwi sa pananaksak ni Franz sa kanyang mister.
Tinamaan ito sa tiyan na agad namang isinugod sa ospital ngunit ideneklara nang dead on arrival ng mga doktor.
Sa ngayon, nananatili na sa kustodiya ng mga otoridad ang misis habang hinahanda ang kasong isasampa laban dito.
