Nagbabala si Senator-Judge Alan Peter Cayetano na maaaring magresulta sa mistrial an impeachment trial ni Vice President Sara Duterte kun babaguhon an voting threshold mantang nagpapadagos an paglilitis.
Segun ki Cayetano, dapat magdanay an mga reglamento na itinugdas sa kapinunan kan trial sagkod sa huring kabtang kaini.
Idiniin niya na habo niyang mawara sa kawaran an mga nagin trabaho asin proceedings kan senate impeachment court huli sana sa pagbabago kan voting requirement.
Sa presenteng ruling ni Presiding Officer Francis Escudero, kinakaipuhan an 16 na boto para ma-convict an Bise Presidente, katumbas kan two-thirds kan bilog na 24-member Senate.
Nagbukas giraray an isyu matapos kwestyunon ni Senador Erwin Tulfo kun dapat isama sa bilang an mga senator-judge na dai makadalo o makapartisipar sa proceedings.
Huli kaini, naghagad an impeachment court nin opinyon sa mga retiradong Supreme Court magistrates na nagsirbing Amici Curiae manungod sa interpretasyon kan constitutional requirement na “Two-thirds of all the members of the Senate.”
Sinabi ni Cayetano na nirerespeto niya an mga legal experts alagad naniniwala na an mga constitutional questions dapat resolbahon kan Supreme Court.
Nakatakdang dinggin sa Setyembre 23 an oral arguments kan prosecution asin defense bago magdesisyon an mga senator-judge kun papagdanayon o babaguhon an 16-vote ruling.
