Mayong nakaschedule na miting sinda Presidente Ferdinand Marcos Jr. asin United States President Donald Trump sa panahon kan 2025 APEC Summit sa South Korea.
Ini an pigbuyagyag ni Department of Foreign Affairs (DFA) spokesperson Angelica Escalona. Kan haputon kun igwa nin nakatakdang pag ulay sinda Presidente Marcos asin Chinese President Xi Jinping, sinaysay ni Escalona na sa ngunyan mayo man nakaschedule na miting sina Presidente Marcos asin Xi.
Sa report, kinumpirmar kan White House na makakapag-ulay si Trump kan saiyang Chinese counterpart sa South Korea.
Alagad, sinaysay kan opisyal kan DFA na igwa nin duwang bilateral meetings na pina-plantsa alagad dai nagtao nin dugang na detalyes an nasambitan ng opisyal kan departamento.
Sinaysay pa ni Escalona na an partisipasyon ni Presidente Marcos nakasentro sa pagbubusol kan economic interests kan nasyon, mas pararumon an koneksyon kaiba an APEC members asin liwat pagpatibayon an commitment sa pananaw kan APEC na sarong mas bukas, mauswag asin dinamikong Asia-Pacific sa sarong marikas na nagbabagong regional landscape.
An duwang sesyon kan APEC Economic Leaders Meeting pighuhuna na mabunga ini nin outcome documents, kabali an deklarasyon kan mga lider asin tolong kalatas dapit sa ‘artificial Intelligence, demographic change asin cultural creative industries’.
An mga temang ini nagpapatotoo kan mga prayoridad na pigbugtak kan Korea komo host kan APEC sa taon na ini asin nagtatao nin mga trend na nakakaapektar sa pag-uswag kan ekonomiya sa bilog na rehiyon.
