Aktibo na an tolong adaptive traffic signal lights sa mga intersection kan C3 Road, España Boulevard, asin Ramon Magsaysay Blvd, komo parte kan obheto kan Metropolitan Manila Development Authority (MMDA) na mapamarhay an bulos kan trapiko sa Metro Manila.
An mga bagong traffic lights an pormal na pigturn-over kan North Luzon Expressway (NLEX) Corporation sa MMDA kasuodma, Agosto 5, 2025.
Sigun ki MMDA Chairman Romando Artes, makikinabang sa mga adaptive traffic signals an labi 143,000 motorista ara-aldaw na nag-aagi sa mga nasambitan ng tinampo.
Ipinaliwanag ni Artes na dati, mano-manong pigmo-monitor an trapiko kun mayong signal lights, bagay na delikado orog na kun banggi kun saen mayo nang traffic enforcers.
Kaya dakulang tabang an bagong sistema tanganing malikayan an aksidente asin paghihingowa sa tinampo. Dugang pa ni Artes na 90% na kan traffic lights sa irarom kan MMDA an naka-adaptive system na.
Padagos an saindang pakikipag-koordinar sa mga lokal na gobyerno tanganing ibali an saindang traffic lights sa adaptive signaling system asin dagusang mai-integrate sa bilog na Metro Manila.
Mientrastanto, pigsierto man ni Artes sa publiko na preparado sindang maglaan nin mga kagamitan asin personahes sa NLEX Corporation tanganing magamit sa pagpapakarhay kan North Luzon Expressway o NLEX huli sa nagin matinding baha kasuarin sana.
Marurumduman na nagpuon ngunyan na semana an pag-repair sa expressway orog na sa parte kan Valenzuela asin Meycauyan, Bulacan.
Magkairiribahan an DOTr, DPWH, NLEX Corporation asin manlaen-laen na local government unit na sakop kan expressway.
