NAGA CITY- Pigtawan duon kan Nabua Municipal Police Station na mayo sindang pigpipili na mga motorista pag-abot sa pigkukundusir na checkpoint.
Sa entrevista kan Bombo Radyo Naga ki PCPL Jonald Bufete, PIO kan Nabua MPS, sinaysay kaini na mayong diskriminasyon an saindang hepatura pag-abot sa mga pigpapara na mg behikulo sa tinampo.
Sigun pa sa opisyal, gabos na mga lunadan mapa-4 wheels man o motor an subject for checking.
Alagad, an haros yaon sa mga tinampo sa presente an mga nagmamananeho kan saindang mga motor, kun kaya ini man soboot an mga nahihiling kan mga residente.
Katakod kaini, tanganing dagos-dagos an pagtatao nin kaaraman sa publiko dapit sa mga nag-iiral na batas trapiko, an Nabua MPS, nagkukundusir nin training sa mga eskwelahan, barangay tanganing matawan nin magkakanigong impormasyon an mga tawo sa saindang responsibilidad komo mga road users.
Mientrastanto, pigsaysay man ni Bufete na ara-aldaw an saindang pigsasagibo na checkpoint kun kaya naglalaom an opisyal na masunod an gabos sa mga nag-iiral na ley. Sa ngunyan, hagad na sana ni Bufete an kooperasyon kan mga motorista tanganing magin marhay an pagpapautob kan mga kasuguan.
