NAGA CITY- Maabot na sa apat na banwaan sa probinsya nin Camarines Sur an igwang nairerehistrong paglangkaw kan lebel nin tubig dara kan mayong untok na pagbulos kan uran huli sa tropical depression Urduja.
Sa entrevista kan Bombo Radyo Naga ki Che Bermeo, Provincial Disaster Risk Reduction and Managemen Office (PDRRMO) head sa Camarines Sur, sinaysay kaining nairehistro ninda an mga pagbaha sa mga banwaan kan Garchitorena, Goa, Batalan asin Libmanan puon pa kasuodma.
Sigon ki Bermeo, maabot man suboot sa 128 an mga pamilyang paramientras na pigibakwar huli sa posibilidad na landslides urog na sa banwaan nin Garchitorena.
Katakod kaini, regular suboot an ginigibong monitoring sa ngunian kan mga Municipal Disaster Risk Reduction and Management Offices (MDRRMOs) sa manlaenlaeng banwaan tanganing masiyerto na nasa marhay na kamugtakan an mga residente.
Nag-abiso man an opisyal sa mga residenteng nakaistar sa mga coastal areas, pamitisan kan bukid asin gilid kan salog na magin alerto asin preparado sa gabos na oras tanganing malikayan an mga dai nilalaomang pangyayari katakod kan huma kan nasambitan ng bagyo.
Kun marurumduman, amay na sinuspendir ni Camarines Sur Gov. Migz Villafuerte an laog sa gabos na antas sa parehong pampubliko asin pribadong mga eskwelahan sa CamSur tanganing masiyerto na salabado suboot an mga estudyante sa aksidente.
