Padagos pang pighahanap ngunyan kan mga otoridad an sarong nagpabistong agent kan Philippine Drug Enforcement Agency (PDEA) na pigsasabing nansuntok asin nantutok nin badil sa Barangay Sta. Cruz, Naga City.
Sa entrevista kan Bombo Radyo Naga ki SPO2 Toby Bongon, tagapagtaram kan Naga City Police Office (NCPO), sinaysay kaini na padagos an saindanga ginigibong operasyon para madakup an suspek na si Jemer Aycardo.
Napag-araman na papuli na kuta na sa saindang harong an mag-amang sinda Fernando Lara Sr., 50-anyos asin Fernando Bancoro, 25-anyos kan bigla na sana sindang apudun kan suspek.
Sa dae maaraman na rason, bigla na sana suboot sinuntok ni Aycardo an mga biktima asin tinutukan pa ini gamit an dae pa maaraman na klase nin badil.
Sigon ki Bongon, pinahimutikan kan PDEA Camarines Sur na kabuhan ninda o agent ninda an naunambitang suspek.
Nakatalaan man sampahan nin kasong unjust vexation, physical injuries asin alarm and scandal an duminulag na suspek.
Napag-araman na nasa impluwensya nin arak an suspek kan mangyari an insidente.
