Pigtaas kan National Food Authority (NFA) sa P28 kada kilo an presyo nin pagbakal nin malinig asin marhay na alang na paroy sa mga probinsya kan Camarines Sur asin Camarines Norte, poon Oktubre 5 sagkod 11.
Sa intrevista kan Bombo Radyo Naga kay Jennilyn Celestial – Branch Manager, National Food Authority – Camarines Sur, sinabi kaini na may katuyuhan an nasabing lakdang na dugangan an kinikita kan mga lokal na parauma asin tig-enkaminar sinda na sa NFA na sana ipabakal an saindang mga ani imbes na sa mga pribadong komersyante.
An pag-adjust na ini sa presyo parte kan amay na pagpreparar kan ahensya sa posibleng epekto kan El Niño na pighuhuna na magdadara nin tagmara na panahon asin posibleng magpababa sa pankagabsan na produksyon nin paroy asin bagas sa nasyon.
Sa presente, may target an ahensya na makabakal nin sagkod 450,000 sako nin paroy sa rehiyon, mantang igwa pa ini nin presenteng imbentaryo na nasa 470,000 sako na nakatago sa mga bodega sa duwang probinsya.
Mientrastanto, tanganing dai maapektuhan an mga konsumidor, ipagpapadagos pa man giraray an pagpabakal nin baratong bagas sa presyong P20 kada kilo sa mga piniling saodan tanganing mapagdanay na abot-kaya an pagkakan kan mga namamanwaan sa ibong kan huma nin kalamidad.
