Pigtawan-duon ni National Irrigation Administration (NIA) Administrator Eduardo Guillen an importansiya kan mga dam sa flood control o pagpugol sa mga pagbaha sa tahaw kan pagpapakawala kan tubig kan mga dam sa Luzon.
Sigun ki Guillen, sa likod kan pagpapakawala kan tubig sa mga darakulang dam, dakulang tabang an mga ini tanganing makontol an biglaang pagbaha sa mga hababang lugar.
Pighalimbawa kan opisyal an makukusog na pag-uran na naeksperyensiyahan sa kadakol na mga lugar sa Northern Luzon, orog na sa Cordillera asin Cagayan Valley kun saen nagibo nin mga darakulang dam na ma-contain o makaputan an dakulang bulto kan tubig.
Paliwanag ni Guillen, kun dae napugolan na magbulos an mga tubig sa mga kaharongan, posibleng mangyari an flash flood o biglaang pagbaha sa mga hababang lugar mantang sa tabang kan mga dam nagigibo pa man na ma-contain an mga nasambitan ng tubig sa tabang kan darakulang reservior.
Bagaman dagusan man papakawalan an tubig na natipon sa mga dam, pigpaliwanag ni Guillen na kontrolado an pagpapakawara kan tubig asin padikit-dikit na iluluwas an mga ini tanganing dae magigin biglaan an paglobo kan tubig.
Sa siring na paagi soboot, nagigin dakulang tabang an mga dam sa pagkontrol sa mga biglaang pagbaha, apwera pa sa mga tabang an mga ini sa irigasyon asin power generation.
