NAGA CITY- Sarong bulan makalihis an pagtama kan bagyong Nina sa rehiyong Bicol, mayo pa nanggad suboot nareresibe na ibang tabang an nagkapirang mga nabiktima kan bagyo sa banwaan nin Minalabac, Camarines Sur.
Sa entrevista kan Bombo Radyo Naga sa sarong residente na nagsayuma ng magtao kan saiyang pangaran na hale sa barangay Irayang Solong sa nasambitang banwaan, sinaysay kaini na mga relief goods pa sana hale sa saindang barangay an naresibe nindang tabang.
Sigon man suboot sa lokal na gobyerno kan Minalabac, na kinakaipuhan muna na maghalat kan mga nabiktima kan bagyo mantang pigpapakarhay pa ninda an ipapanaong mga tabang.
Sigon sa residente, mayo pa nanggad saindang nakakaabot na tabang hale sa Department of Social Welfare and Development (DSWD).
Mayo pa man suboot sindang nareresibeng mga trapal para sa saindang naraot na mga harong.
Mientrastanto, nagkapirang mga barangay man sa banwaan nin Minalabac an igwa ng suplay nin kuryente sa ngonyan.
Napag-araman na saro an nasambitang banwaan sa labing pigtamaan kan bagyong Nina.
