Nagbaba sa 2.03 million an numero kan mga Pilipinong mayong trabaho sa nasyon kan Mayo 2025 gikan sa 2.06 milyong unemployed kan Abril.
Basado sa latest Labor Force Survey, pigreport ni Philippine Statistics Authority (PSA) USec. Claire Dennis Mapa, na nagbaba an unemployment rate sa 3.9% kan Mayo gikan sa 4.1% na naikurit kan Abril 2025 asin Mayo kan 2024.
Sigun sa PSA official, 39 sa kada 1,000 indibidwal na nasa labor force an mayong trabaho o negosyo kan Mayo kan presenteng taon.
Paliwanag ni USec. Mapa na an pagbaba kan unemployed sa nasyon an kawsa kan paglangkaw sa 1.35 million kan mga indibidwal na naglaog sa labor force puon Mayo 2024 hasta Mayo 2025 kun saen haros gabos an nagkaigwa nin trabaho.
Apwera digdi, pig-tukoy man kan PSA chief an pirang mga sektor na nakapag-ambag sa pagbaba kan numero kan mga Pilipinong mayong trabaho kabali na an paglangkaw kan mga nagkatrabaho sa wholesale asin retail trade, agriculture and forestry, administrative support service activities, accommodation food services, political organization asin real state activities.
Mientrastanto, pigreport man kan PSA na nagbaba an numero kan mga Pilipinong underemployed sa 6.60 million o katampad kan 13.1% kan Mayo kan presenteng taon gikan sa 7.09 million o 14.6% kan Abril.
Pag-abot man sa employment, naglangkaw an numero mga nagkatrabaho kan Mayo sa 52.32 milyong Pilipino gikan sa dating 50.74 million na naikurit kan Abril 2025.
