Orog pang naglangkaw an numero kan mga apektadong residente sa probinsya nin Sorsogon, kasunod kan pirang serye nin phreatic eruption kan bulkang Bulusan.
Basado sa datos man Provincial Disaster Risk Reduction and Management Office kan Sorsogon, nagpakol na sa 93,258 indibidwal an naapektuhan sa mga serye nin pagsabog.
An mga ini an gikan sa walong banwaan kan nasambitan ng probinsya. Nag abot na man sa kabilogang 59 na pamilya an pig-ebakwar asin paramientras nagdadagos sa duwang binuksang evacuation center.
Nasa 25 sa sainda an nasa Irosin Evacuation Center asin man 34 an presenteng nasa Gallanosa National High School.
Enot na nagputok an bulkan kan nakalihis na aldaw nin Lunes na mag-oomagahon April 28 asin sinundan nin nagkapira pang maluluyang pagbuga nin aso. Basado man sa report kan Philippine Institute of Volcanology and Seismology (Phivolcs), nag abot na sa 19 barangay an apektado kan ashfall.
An mga ini ay gikan sa mga banwaan kan Juban, Irosin, asin Bulan. Sa nakalihis na 24 oras, liwat man nakapagrehistro an Phivolcs nim kabilogang 66 volcanic earthquake, kawsa kan bulkang Bulusan.
Enot nang itinaas sa Alert Level 1 an status kan bulkan gikan sa dating Alert Level 0.
