Nagbaba na sa poco mas o menos 450,000 an numero kan mga soldados kan nasyon sigun sa Ministry of National Defense kan South Korea, kun saen nabawasan nin 20% sa nakalihis na anom na taon.
Pigtutukdo kan mga otoridad komo primerong rason iyo an padagos na pagbaba kan birth rate na ngunyan an nasa 0.75 na sana kada babae an nangangaki na pinakahababa sa bilog na kinaban.
Obligado pa man an military service sa South Korea huli ta dae pa pormal na natatapos an kariribokan kaini sa North Korea, na igwang pigkakarkulong 1.3 milyong aktibong soldados.
Sigun sa sarong pag-aadal, kaipuhan kan South Korea nin dae mababa sa 500,000 soldados tanganing epektibong depensaran an sadiri gikan sa posibleng pag-atake kan North Korea.
Sa padagos na pagbagsak kan numero, sinaysay kan mga eksperto na nasa “masakit na posisyon” an nasyon pag-abot sa pambansang depensa.
Puon 2006, nabawasan man an numero kan military division gikan sa 59, pababa sa 42, bunga kan pagsasanib o pagbuwag kan nagkapirang unit.
Komo kasimbagan, padagos na naglalangkaw an budget sa depensa kan nasyon. Ngunyan na taon, nag-abot sa labi $43 billion an pondo kan gobyerno sa ilitary, mas dakula kaysa sa kabilogang GDP kan North Korea.
Alagad maski sapiritan an military service sa mga kalalakihan, nagtitinir na kontrobersyal an sistema, orog na ta huli sa epekto kaini sa career kan mga kajovenan.
Igwang nagkapirang konserbatibong kampo man an nangapodan na ibali pa man an mga kababaihan sa conscription sa tahaw kan krisis sa populasyon.
