NAGA CITY- Padagos an pigsasagibong relief efforts kan Office of Civil Defense (OCD) sa Bicol Region para sa mga residentes na apektado kan pagputok kan Mt. Bulusan sa Sorsogon.
An nasambitan ng lakdang an nakalinyada sa whole-of-government approach na mandato ni President Ferdinand R. Marcos Jr., tanganing masierto an sararo asin komprehensibong pagresonde sa kalamidad.
Katakod kaini, mahigot man an ginigibong monitoring sa sitwasyon ni Defense Secretary and National Disaster Risk Reduction and Management Council chair Gilberto Teodoro Jr. asin OCD executive director, Undersecretary Ariel Nepomuceno tanganing maitao an gabos na suporta sa apektadong komunidad.
Apwera digde, naghagad naman nin asistensiya an provincial government kan Sorsogon sa pagkundusir nin aerial surveys tanganing i-assess an damage na kawsa kan ashfall.
Mientrastanto, nag-inspeksyon man an Office of Civil Defense-Bicol sa evacuation center sa Juban tanganing personal na mahiling an condition kan mga nag-ibakwar na residentes asin matawan nin magkakanigong suporta.
Sa ngunyan, basado sa bagong report kan OCD, nagpakol na sa 14,830 families, o poco mas o menos 74,209 indibidwal an apektado kan eruption kun saen nasa 19 pamilya o 61 na indibidwal an nagtitinir sa duwang evacuation centers
