Duwang beses na mapautob an mga kompaniya nin langis kan umento sa presyo kan mga produktong petrolyo ngunyan na huring semana kan Hunyo.
Ini an kasunod kan pagtugot kan mga kompaniya nin langis na padikit dikit na ipautob an big-time oil price hike puon ngunyan na aldaw nin Martes, June 24.
Resulta kni kan pakikipag-ulay kan mga opisyal kan Department of Energy (DOE) sa mga representantes kan mga kompaniya nin langis na positibo na man na magsimbag sa kahagadan kan gobyerno.
Ngunyan na Martes, epektibo kasubagong alas-6:00 nin aga, nagpautob an tolong darakulang kompaniya nin langis na umentong P2.60/L sa diesel, sa gasolina man P1.75/L, mantang sa kerosene P2.40/L an ipiglangkaw.
Sa aldaw kan Huwebes, June 26 parehong umento sa mga produktong petrolyo an ipapautob.
An iba man na kompaniya kan langis ngunyan na martes, nagpautob nin umento na P3.45/L sa diesel, P2.25/L sa gasolina asin P3.20/L sa kerosene.
Piglalaoman man sa aldaw nin Biyernes, June 27, mapauton an nasambitan ng kompaniya kan umentong P1.50/L sa diesel, P1/L sa gasolina asin P1.40/L sa kerosene.
Sigun sa DOE, pigsumiter kan mga kompaniya nin langis an saindang implementation scheme kaibahan an breakdown kan staggered adjustment kasuodma.
Ginibo man an nasambitan ng lakdang sa tahaw kan pagkahadit sa pangkinaban na suplay kan langis huli sa nagtitinding labanan sa tahaw kan Israel asin Iran kun saen nangiaram na man an Amerika.
Pigpepreparar na man kan gobyerno an fuel subsidy para sa mga maapektarang operators asin drivers kan mga pampublikong transportasyon huli sa piglalaomang pagsipa kan presyo kan langis sa pangkinaban na merkado dara kan conflict sa Middle East.
