Nagsampa ang Office of the Ombudsman ng kasong plunder laban kay Senador Rodante Marcoleta sa Sandiganbayan kaugnay ng umano’y hindi niya pagdedeklara ng ₱75 milyong campaign donations na natanggap niya noong Enero 2025. Kinasuhan din ang tatlo niyang donor na sina dating kongresista Mike Defensor at mga negosyanteng sina Joseph Varias Espiritu at Aristotle Baluyut Viray.
Ayon sa Ombudsman, natanggap ni Marcoleta ang naturang halaga sa tatlong magkakahiwalay na transaksyon bago pa magsimula ang opisyal na campaign period para sa 2025 elections. Batay sa mga dokumento, nagbigay umano si Defensor ng ₱30 milyon, si Espiritu ng ₱25 milyon, at si Viray ng ₱20 milyon.
Lumabas umano sa imbestigasyon na hindi isinama ni Marcoleta ang mga donasyon sa kanyang Statement of Contributions and Expenditures (SOCE) at maging sa kanyang Statement of Assets, Liabilities and Net Worth (SALN). Dahil lumampas sa ₱50 milyong threshold sa ilalim ng anti-plunder law, isinampa laban sa kanya ang kasong plunder na isang non-bailable offense.
Mariing itinanggi ni Marcoleta ang mga alegasyon at iginiit na hindi maaaring ituring na pampublikong pondo ang mga donasyon dahil natanggap ang mga ito bago ang campaign period. Nauna na rin siyang nalinis ng Commission on Elections sa usapin ng election offenses noong Marso 2026.
Ayon sa Ombudsman, tungkulin nitong ipatupad ang batas anuman ang katayuan ng isang opisyal sa gobyerno. Binigyang-diin din nito na walang puwang ang konsepto ng “utang na loob” sa serbisyo publiko kung ito ay gagamitin upang bigyang-katwiran ang hindi pagdedeklara ng malaking halaga ng pera.
