NAGA CITY- Arestado an sarong online seller na lalaki kan mga otoridad kan Disyembre 27, 2024, makalahis an pagpapabakal nin ilegal na paputok sa Gov. Jose Fuentebella National Highway, sa Barangay Anayan, Pili, Camarines Sur.
Binisto an suspek na si Alyas Oli.
Sa imbestigasyon, na-monitor an nasambitan ng suspek na nagpapabakal nin ilegal na paputok sa paagi kan mga post kaini sa social media.
An pagbalgar an taliwas sa probisyon kan Republic Act 7183 o an Act Regulating the Sale, Manufacture, Distribution, and Use of Firecrackers and Pyrotechnic Devices asin sa bisa kan Executive Order No. 28. Apwera pa digdi, posible man mahampang an suspek sa irarom kan Section 6 kan RA 10175, o mas bistado komo Cybercrime Prevention Act of 2012.
Mientrastanto, sa isinagibo man na operasyon, narekober gikan sa suspek an tolong pidaso kan boga o improvised cannon, duwang spray kan denatured alcohol, asin sarong cellphone na ginagamit soboot sa ilegal na transaksyon.
Sa ngunyan, nasa Pili Municipal Police Station na an nasambitan ng suspek para sa magkakanigong disposisyon.
Katakod kaini, liwat man na nagpagirumdom an mga otoridad na mahigot na ipinagbabawal an pagpapabakal nin ilegal na paputok, orog na ta nagrarani na an pagselebrar kan Bagong Taon.
Apwera pa digdi, pig-enkaminar man kan mga otoridad an publiko na magsunod sa ley asin maglikay sa pagbakal o paggamit nin mga ipinagbabawal na pyrotechnic devices.
