Ipapanao an kantidad na P3 bilyong fuel subsidy ngunyan na bulan sa kinakarkulong 300,000 na paraoma, parasira, asin truck driver na naghahatod nin mga produktong agrikultural sa irarom kan UPLIFT program kan gobyerno.
Ini an ipinahayag kan Malakanyang kasunod kan report ni Agriculture Undersecretary Arrey Perez, na ini parte kan ayuda kan gobyerno tanganing maibsan an epekto kan El Niño asin halangkaw na presyo nin krudo sa sektor nin agrikultura.
Makakaresibe an mga paraoma asin parasira nin P5,000 na one-time fuel subsidy para sa paggamit nin tractors, motorized bancas, asin iba pang kagamitan na nangangaipo nin gasolina.
Mientrastanto, P2,000 kada semana an fuel subsidy para sa mga driver nin delivery truck na naghahatod nin ani hale sa mga umahan pasiring sa Metro Manila asin iba pang saodan.
Naglalaog sa kooperasyon ngunyan an Department of Agriculture sa Land Bank of the Philippines tanganing maparikas an pagwaras kan ayuda sa paagi kan mga branch asin ATM kaini.
Pig-aadalan man kan Toll Regulatory Board asin kan mga tollway operator an toll holiday o diskwento para sa mga agri-delivery truck sagkod Disyembre 31.
Sinabi ni Perez na naglalaom an DA na makakakua tulos nin kasunduan sa mga tollway operator tanganing maipatupad an toll relief ngunyan na bulan.
