Pig-apriburan na sa ikatolo asin huring pagbasa sa Senado an prosopwestong P6.352 trillion national budget para sa 2025.
Nagboto an 18 senador na pabor, mayong negatibong voto, mantang nag-abstain si Senate Minority Leader Aquilino “Koko” Pimentel. Segun ki Pimentel, nag-abstain ini tanganing mamantenir an saiyang “wait and see attitude” asin hilingon kun ano an mangyayari sa mga “bicameral conference meetings.”
Segun ki Sen. Grace Poe, pamayo kan Senate Committee on Finance, an pagpondo kan Office of the Vice President asin magin an Ayuda para sa Kapos ang Kita Program (AKAP) madeterminaran sa diskusyon kan bicameral conference committee huli ta kaipuhan pa nindang magkonsulta an saindang counterparts sa Kamara.
Enot kaini, hinali kan Senado an P39 bilyones na funding proposal para sa AKAP, an cash aid program para sa minimum wage workers.
Segun ki Pimentel, dapat na i-monitor sa AKAP an nasambitan ng pondo. Sinaysay man ni Pimentel na dapat magkaigwa nin disiplina sa paggastos nin pondo asin likayan an “wasteful spending.”
Nagpagirumdom man si Pimentel na maabot sa P1.53 trilyon an piglalaoman na kakulangan nin pondo o budget deficit sa 2025 mantang an utang kan gobyerno nasyonal piglalaoman na mapakol sa P17.35 trilyon asin an gross borrowings para sa 2025 mapakol sa P2.5 trilyon .
