Naaresto ang isang 31-anyos na lalaki sa isang buy-bust operation ng Regional Police Drug Enforcement Unit 5 (RPDEU5) sa Brgy. Maydaso, Milaor, Camarines Sur bandang 10:22 ng umaga noong Abril 18, 2026. Nasamsam sa operasyon ang tinatayang 130 gramo ng hinihinalang shabu na may halagang humigit-kumulang ₱884,000.
Ayon sa ulat, target ng operasyon ang suspek na kilala sa alyas na “Alex” matapos nitong pagbentahan ng isang sachet ng hinihinalang shabu ang isang police poseur-buyer kapalit ng ₱55,000.00.
Matapos ang aktuwal na transaksyon, agad na inaresto ang suspek ng mga operatiba. Isinagawa rin ang sumunod na paghahalughog sa lugar na nagresulta sa pagkakarekober ng karagdagang 105 gramo ng hinihinalang shabu, bukod pa sa 25 gramo na unang ibinenta.
Sa kabuuan, umabot sa 130 gramo ang nakumpiskang ilegal na droga na tinatayang nagkakahalaga ng ₱884,000 batay sa Standard Drug Price.
Isinagawa ang pagmamarka at imbentaryo ng mga nakuhang ebidensya sa mismong lugar ng operasyon sa presensya ng suspek, mga kinatawan ng media, at iba pang saksi upang matiyak ang transparency at integridad ng operasyon.
Kasalukuyang nakakulong ang suspek sa Milaor Municipal Police Station at nahaharap sa kasong paglabag sa Republic Act 9165 o Comprehensive Dangerous Drugs Act of 2002.
