NAGA CITY- Nagtitinir pa man giraray na palaisipan sa mga residente kan sarong barangay sa Sagñay, Camarines Sur an pagluha nin dugo ni Our Lady of Fatima kasabay kan pagrumdom sa Semana Santa.
Marurumduman, nagin laog kan urulay-ulay an soboot pagluha nin dugo kan imahe sa katahawan kan mga aktibidad na pigkokondusir na igwa nin kinaaraman sa Semana Santa o Holy Week.
Sa entrevista kan Bombo Radyo Naga ki Nida Geronimo, overall coordinator kan Soldier of Christ, sinaysay kaini na kadakol an nagtutubod na sarong milagro an nangyari alagad nagtitinir man soboot na palaisipan para sa sainda an rason kaini asin kun maiikonsiderar ba talaga ining sarong himala. Nakaabot naman an bareta sa Archdiocese of Caceres asin presente nang nagsasagibo nin imbestigasyon an simbahang Katolika dapit sa nasambitan ng pangyayari.
Enot naman na nagpaluwas nin pahayag si Bishop Elect Rev. Father Louie Occiano dapit digdi, kun sain posible soboot abuton nin pirang taon antes na dagusang mapatotoohan na milagro nga an nangyari. Ini orog na ta kaipuhan pang mag-agi sa mga pag-aadal tanganing maaraman kun talaga bang dugo an pigluha kan imahe asin naggikan talaga ini digdi.
Tinawan duon man kan mga ini na baku sana an Archdiocese of Caceres an magsasagibo nin imbestigasyon kundi magin an Vatican antes na mailuwas an resulta kan mga pag-aadal. Dugang pa ni Geronimo, komo sarong katoliko nagtutubod ini na igwa nin mawot na ipaabot si Our Lady of Fatima kun kaya nangyari an insidente. Ini man soboot an pinaka primerong pagkakataon na nangyari ini sa saindang lugar magin sa bilog na probinsya kan Camarines Sur.
Mientrastanto, sa halip man na matakot mas orog kaining pinakusog asin pinapusog an saindang pagtubod sa Kagurangnan magin an saindang kamawotan na makapaglingkod sa saindang kapwa tawo. Sa ngunyan, magtitinir naman an imahe sa saindang parokya asin maghahalat na sana sinda nin kasuguan gikan sa mas halangkaw na opisina kun ano an dapat nindang gibuhon para digdi.
Sa ibong na lado, magpapadagos man an isinasagibo nindang pagmimisyon sa mga komunidad tanganing mas orog na mairani baku sana an pananampalataya kundi an mga adal na makakatabang tanganing magin sarong marhay na parte kan komunidad an lambang namamanwaan.
