NAGA CITY – Kamawotan na maaprobaran an ordinansang ipigbubusol kan konsehal sa banwaan kan Calabanga, dapit sa Fisheries Code.
Sa entrevista kan Bombo Radyo Naga ki Adonis Aguillar Jr., Municipal Councilor- LGU-Calabanga, Camaries Sur, pigsaysay kaini na an pag-amiendar sa Fisheries Code 2003 obhetong maprotehiran an kadagatan kan banwaan.
An nasambitan naman na ordinansa an naamiendaran pa sana makalihis an 20 taon. Kun kaya, pigdugangan soboot ini nin mga bagong National asin Local ordinances, saro na digdi an pagprotehir sa saindang kadagtan.
Boot sabihon kaini, enkaso soboot maaprobaran ini, an gabos na mga bakong residente kan banwaan an pagbabawalan ng maglawod digdi.
Ini nin huli ta sa pagtaraid man na banwaan, pinagbabawalan man an mga parasisira ninda na maglawod sa saindang kadagatan mantang an mga parasisira kan ibang banwaan an nakakapaglawod sa saindang kadagatan.
Huli digdi, kun kaya pinag-esplikar kan konsehal sa saindang mga parasisira kun tano dapat maaprobaran an siring kan ordinansa nin huli ta bako sanang an mga makukua ninda digdi an mapoprotehiran kaini alagad dapat man maprotehiran para sa mga masurunod pang henerasyon kan mga kaakikan kan mga parasisira.
Kaidto kaya soboot an bistado an banwaan sa mga blue crabs, mga darakulang fish shell alagad ngunyan an padiit-diit nang nawawara.
Mientrastanto, pig-enkaminar man kaini an mga parasisira na magparehistro kan saindang mga baroto asin sadiri sa Fisheries Management Unit orog na ta sisimbagan na kan konsehal an saindang Mayor’s permit sa Enero asin Pebrero sa masunod na taon.
