Pighurot ni Sen. Bam Aquino an pangangaipuhang i-relocate an dakulang parte kan flood control budget kan Department of Public Works and Highways (DPWH) sa 2026 sa sektor kan edukasyon sa tahaw kan imbestigasyon kan mga soboot anomalya sa mga proyekto sa bilog na nasyon.
Sinaysay ini ni Aquino sa sarong pahayag makalihis an saiyang inspeksyon sa Lakandula Elementary School asin Dr. Adelaido C. Bernardo High School sa Mabalacat City, Pampanga, kun saen itinukdo kaini an pangangaipuhan na magtugdok nin mas kadakol na klasrum sa mga pampublikong eskwelahan.
Sigun ki Aquino, chairperson kan committee on basic education, an P275-bilyong proposed budget kan DPWH para sa flood mitigation an pwedeng mabawasan nin dakula, asin an pagbawas an pwedeng maibalyo sa sektor kan edukasyon. Mawot kan opisyal na mahiling an mas organisadong flood control fund.
An kantidad kaya na mababawas an nasa P100 billion, na mawot kaining maibalyo sa sektor nin edukasyon. Naenot digde, sinabi ni Sen Win Gatchalian, chair kan Senate committee on finance, na mawot kan mga senador na ibasura an P270-bilyong alokasyon para sa flood control kun dae papakarhayon kan DPWH an soboot maanomalya asin ghost projects sa propwestong budget kaini para sa 2026.
Sa parehong pahayag, pig utro ni Aquino an saiyang pangapudan na tawan nin awtorisasyon an mga local government units (LGUs) asin non-government organizations (NGOs) na magtugdok nin mga klasrum sa bilog na nasyon, imbes na itagama sa DPWH.
Pigbubusol ni Aquino an pagsasabatas kan saiyang propwestong Senate Bill No. 121, na bistado man komo Classroom-Building Acceleration Program Act, na obhetong tawan nin awtorisasyon an mga LGU asin NGO sa pagtutugdok nin mga klasrum komo pagsunod sa mga pambansang pamantayan asin alituntunin sa laog kan saindang mga nasasakupan, na may suporta sa pagpopondo gikan man sa pambansang gobyerno.
Dugang pa kan opisyal, kaipuhan na magtiwala an gobyerno sa kakayahan kan LGUs asin NGOs na determinado na mapamarhay an lado kan edukasyon sa lambang mga kumunidad.
