Pupuonan na kan Independent Commission for Infrastructure (ICI) an asset recovery o an pagbawi kan mga ari-arian kan mga imbwelto sa maanomalyang proyekto asin maibalik an kwarta sa taumbayan sa paagi kan mga civil asin administrative remedies.
Sigun ki ICI Spox Brian Keith Hosaka, saro sa mga lakdang kan asset recovery iyo an pag-freeze na kan nasa 2,800 bank accounts kan nagkapirang opisyal na nagkakantidad nin nasa haros Php 5B, sigun sa report kan Anti-Money Laundering Council (AMLC).
Kasabay kaini, ipasusubasta na man sa mga masunod na semana an 13 luxury cars kan mag-agom na Curlee asin Sarah Discaya makalihis madiskubre kan Bureau of Customs (BOC) na kulang an mga dokumento kan mga mamahalong lunadan.
An makukuang kita an itatagama sa gobyerno tangani magamit pa sa ibang proyekto na makakatabang sa mga Pilipino. Sigun ki Hosaka, hinahalat na sana kan BOC an approval gikan sa Department of Finance antes na isagibo an auction.
Katakod kaini, napag-ulayan man sa nagin asset recovery meeting kan ICI katabang an nagkapirang ahensya kan gobyerno na magbilog man nin technical working group para sa pagbabawi kan mga hinabon na kwarta tangani mapahusay an koordinasyon asin legal na proseso sa pagbawi kan mga pondong nakua gikan sa mga maanomalyang proyekto.
